عتب ★*★*★بقلم الأستاذ المبدع//نجاح ناجي اللوزه//العراق★*★*★

( عتب )
ما أعتب عل السياسي التاجر بذمته
وما أعتب عل المعمم لإشترى الدنيا بأخبرته
وما أعتب عل المعكل ....
إلداس القيم والأخلاق بطرف قندرته
أعتب عل الشعب إلخله الخنجر بخاصرته
وأعتب عل الشريف إلسلم الأغراب صاحبته
وأعتب عل الأصيل الضيع بنص الدرب راحلته
وأعتب عل العراقي الضيع بين الدول منزلته
عليمن يا  شعب تصرخ دوم ...
واليصرخ بس يجرح بحنجرته
شما تصرخ يا شعب مذلول ...
جبتلنا الحقير وأنت نصبته
لجرب المجرب وأمعن التفكير
وإنتخب الأصيل المعروفه مقدرته
شنحجي يا سياسي الصدفه ونكول
العراق اليوم بيدك أنت دمرته
دمرت العراق ونصبت كومه أشرار
وبوضوح النهار الخير فرهدته
لا باقي نفط لا عدنا خيرات
بيدك عل الحراميه وإنت قسمته
ندري بيك مأمور بأمر الأسياد
وبوس القنادر منصبك حصلته
كلشي بهل البلد اليوم دمرتوا
ويا خير إل إجانه وانت عمرته
كافي يا شعب وأترك الأحقاد
وإنتخب الشريف اليحسن إلخاتمته
إنهض يا شعب ثورة العشرين
رجع للبلد هيبته ومقدرته
وأطرد كل عميل وخائن  وغدار
مثل جيش الإنكليز  بيوم أدبته
ورجع هيبة التأريخ يل بيدك كتبته
و إنت دونته ...
وبأحرف من ذهب بالعز سطرته
 
  ( نجاح ناجي اللوزه )
تركيا ..............  ٢٠١٩